Технологиялық идеяңыз бар, бірақ оны нарықта сұранысқа ие өнімге қалай айналдыруды білмейсіз бе? Инкубациялық бағдарлама идеяңыздың өміршеңдігін бағалауға, жобаңызды жетілдіруге және оны коммерцияландыруға дайындауға мүмкіндік береді.

Сізді не күтеді?

2–24 сәуір аралығында өтетін үш апталық қарқынды бағдарлама барысында қатысушылар білім беру модульдерінен өтіп, практикалық сабақтарға қатысады, бизнес-трекерлер мен шақырылған бизнес-тәлімгерлердің жетекшілігімен жұмыс істейді. Бағдарлама барысында идеядан сарапшылар алдында таныстыруға дайын жобаға дейінгі жолдан өтесіз.

Бағдарлама барысында сіз:

• мақсатты аудиторияның қажеттіліктеріне негізделген мәселені анықтап, тиімді шешім әзірлейсіз;
• Customer Development әдістемесі бойынша тұтынушыларды зерттейсіз;
• жобаның бірегей құндылық ұсынысын (UVP) және бизнес-моделін әзірлейсіз;
• ең төменгі өміршең өнімді (MVP) жасап, оны тестілейсіз;
• нарық пен бәсекелестік ортаны талдайсыз;
• қаржылық модель мен бизнес-жоспар дайындайсыз;
• жобаның Pitch презентациясын әзірлейсіз;
• Demo Day барысында жобаңызды сараптамалық комиссия алдында қорғайсыз.

Неліктен қатысу маңызды?

Инкубациялық бағдарламаны сәтті аяқтап, жобаларын қорғаған қатысушыларға сертификат табысталады. Бұл сертификат QazInnovations өткізетін «Өнімді пысықтау және коммерцияландыру стратегиясын әзірлеу» жобасын іске асырудың I кезеңі бойынша технологияларды коммерцияландыруға арналған инновациялық гранттар конкурсына қатысуға мүмкіндік береді.

Өз технологиялық стартапыңызды құру жолындағы алғашқы қадамыңызды жасаңыз! Инкубациялық бағдарламаның үшінші легіне қосылыңыз!