Инновациялық Еуразия университетінің студенттері Сергей Балаба мен Богдан Громов «AI&Arduino Hack 2026» ұлттық хакатонында екінші орынға ие болып, жасанды интеллект технологияларын практикалық міндеттерді шешуде қолдану, бағдарламалау және инженерлік жобалау салаларындағы жоғары дайындық деңгейін көрсетті.

Ұлттық хакатон Павлодар қаласында Toraighyrov University базасында өтті. Байқауға Қазақстанның бес жоғары оқу орнынан 32 студент қатысты. Қатысушыларға шектеулі уақыт ішінде жасанды интеллект технологияларын микроконтроллерлермен және электрондық компоненттермен біріктіретін жұмыс істейтін құрылғының прототипін әзірлеу міндеті қойылды.

InEU командасы «Ақылды шлагбаум» («Умный шлагбаум») жобасын ұсынды. Бұл — компьютерлік көру және нысандарды автоматты түрде тану технологияларына негізделген интеллектуалды кіруді бақылау және басқару жүйесі.

Екі күн ішінде Сергей Балаба мен Богдан Громов жүйенің жұмыс істейтін прототипін әзірлеп, құрастырды. Шлагбаумға қосылған камера кескінді компьютерлік көру жүйесіне жіберіп отырды. Жасанды интеллект жақындаған нысанды талдап, келушіні үш санаттың біріне жатқызды: VIP, қонақ немесе бөгде адам.

Тану нәтижесіне қарай жүйе кіруге рұқсат беру туралы автоматты шешім қабылдады: VIP санатындағы пайдаланушыларға кедергісіз өту мүмкіндігі қарастырылды, қонақтарға рұқсат етілген жағдайда кіруге мүмкіндік берілді, ал бөгде адамдар анықталған кезде шлагбаум жабық күйде қалды. Тексеру нәтижелері оператордың бағдарламалық интерфейсінде көрсетілді.

Жобаның бағдарламалық бөлігі Python бағдарламалау тілі және OpenCV кітапханасы арқылы жүзеге асырылды. Аппараттық бөлігі Arduino микроконтроллері негізінде құрастырылып, шлагбаумның атқарушы механизмін басқаруды және электрондық компоненттердің өзара әрекеттесуін қамтамасыз етті.

Осылайша, студенттер нысандарды тануға арналған бағдарламалық алгоритмдер мен аппараттық басқару құралдарын біртұтас интеллектуалды жүйеге біріктіре алды.

Жобаның практикалық маңыздылығы — оны университеттер, өнеркәсіптік кәсіпорындар, тұрғын үй кешендері, автотұрақтар және кіруі шектелген басқа да нысандардың өткізу режимін автоматтандыру үшін қолдану мүмкіндігінде. Мұндай шешімдер көлік құралдары мен келушілерді тексеру уақытын қысқартуға, күзет қызметкерлерінің жүктемесін азайтуға және аумақ қауіпсіздігін арттыруға мүмкіндік береді.

Хакатонның қорытынды кезеңінде командалар өз әзірлемелерін сарапшылар алқасына таныстырып, жасалған прототиптердің жұмыс істеу мүмкіндіктерін көрсетті. InEU студенттерінің жобасы техникалық орындалуы, бағдарламалық және аппараттық бөліктердің үйлесімділігі, сондай-ақ практикалық қолдану перспективалары үшін жоғары бағаланды.

«AI&Arduino Hack 2026» ұлттық хакатонында екінші орынға ие болу — Инновациялық Еуразия университеті студенттерінің маңызды жетістігі. Бұл нәтиже цифрлық технологиялар қарқынды дамып жатқан кезеңде инженерлік құзыреттіліктің, шығармашылық ізденістің және пәнаралық білімнің маңыздылығын айқындайды.

Сергей Балаба мен Богдан Громовты лайықты жеңістерімен құттықтаймыз! Жаңа идеялар, тың әзірлемелер және алдағы байқауларда толағай табыстар тілейміз!

InEU өз студенттерінің жетістіктерін мақтан тұтады!