ИнЕУ студенттері дене шынықтыру және спорт саласындағы технологиялық инновацияларға арналған «Фиджитал спорттех инновациялар кубогы – 2026» халықаралық жастар байқауында Қазақстанның намысын қорғады.

Екі күнге созылған ауқымды шара барысында Сергей Балаба, Александр Митрофанов, Сергей Озеруга және Людмила Шоклевадан құралған команда университеттік ортаға спорттық технологияларды енгізу, заманауи білім беру формаларын дамыту және IT-шешімдерді қолдану бағытындағы идеяларымен бөлісті. Қатысушылар тек тәжірибе алмасып қана қоймай, болашақ білім беру мен спорт индустриясының жаңа мүмкіндіктерін талқылады.

Байқауға Ресей, Қазақстан және Беларусь елдерінен 1400-ден астам өтінім түсті. Қатаң іріктеу нәтижесінде финалға небәрі 43 жоба жолдама алды. Солардың ішінде Қазақстан атынан финалға шыққан жалғыз команда – ИнЕУ студенттері болды. Университет командасы үздік ондыққа еніп, өз жобасын жоғары деңгейде таныстырды.

Санкт-Петербург қаласында өткен финалға 62 қатысушы жиналды. Конференция аясында ұйымдастырылған инновациялық спорттық технологиялар көрмесінде жеті үздік жоба таныстырылып, олардың қатарында ИнЕУ студенттерінің жұмысы да болды. Жоба демеушілер мен халықаралық компания өкілдерінің ерекше қызығушылығын тудырып, жоғары бағаланды.

«Бұл кездесу біз үшін үлкен тәжірибе алаңы болды. Біз жаңа мақсаттарды айқындап қана қоймай, фиджитал-технологиялар ұсынылған интерактивті көрмеде өзімізді сынап көрдік. Осындай орта шабыт беріп, жаңа идеяларға жол ашады», – деді команда үйлестірушісі, «Инженерия және өнеркәсіптік технологиялар» кафедрасының оқытушысы Людмила Шоклева.

Ал команда капитаны Сергей Балаба финал туралы былай деді:
«Финалға шығудың өзі – үлкен жетістік. Мұнда ең үздік командалар жиналды. Біз өз деңгейімізді көрсеттік, енді алған тәжірибені саралап, одан да биік нәтижелерге ұмтыламыз».

Айта кетейік, «Инновациялық Еуразия университеті» ЖШС-нен «IT-Планета» платформасының үйлестірушісі – «Инженерия және өнеркәсіптік технологиялар» кафедрасының аға оқытушысы Ирина Ивановна Ляшенко. Ол олимпиадалар мен чемпионаттарға қатысушыларға тұрақты түрде ұйымдастырушылық және әдістемелік қолдау көрсетіп келеді.

Фото 1

Фото 2

Фото 3

Фото 4

Фото 5

Фото 6

Фото 7

Фото 8

Сертификаттар